1Ch 14 | NdeIBE | STEP | Ngalesosikhathi uHiramu inkosi yaseThire wathumela izigijimi kuDavida, ndawonye lezigodo zomsedari, ababazi bamatshe kanye lababazi ukuthi bayemakhela isigodlo.

1 Chronicles 14

UDavida Labendlu Yakhe

1 Ngalesosikhathi uHiramu inkosi yaseThire wathumela izigijimi kuDavida, ndawonye lezigodo zomsedari, ababazi bamatshe kanye lababazi ukuthi bayemakhela isigodlo.

2 UDavida wahle wakwazi ukuthi uJehova usembekile ukuba abe yinkosi ka-Israyeli lokuthi umbuso wakhe uphakanyisiwe kakhulu ngenxa yabantu bakhe bako-Israyeli.

3 EJerusalema uDavida wathatha abanye abafazi wazala amanye amadodana lamadodakazi. 4 Nanka amabizo abantwana abazalelwa khonale: NguShamuwa, loShobabi, loNathani, loSolomoni, 5 lo-Ibhari, lo-Elishuwa, lo-Eliphelethi, 6 loNoga, loNefegi, loJafiya, 7 lo-Elishama, loBheyeliyada kanye lo-Elifelethi.

UDavida Unqoba AmaFilisti

8 AmaFilisti athi esizwa ukuthi uDavida usegcotshwe ukuba yinkosi yalo lonke elako-Israyeli, aphuma wonke ehlome ephelele esiyamzingela, kodwa uDavida wakuzwa lokho wahle waphuma yena ukuyawahlangabeza.

9 AmaFilisti aphuma ukuyahlasela iSigodi saseRefayimi; 10 ngakho uDavida wabuza kuNkulunkulu wathi: “Ngihambe ngiyewahlasela amaFilisti na? Uzawanikela kimi na?” UJehova wamphendula wathi, “Hamba, ngizawanikela kuwe.”

11 Ngakho uDavida waya eBhali Pherazimi lapho awehlulela khona amaFilisti. Wasesithi: “Njengamanzi akhukhulayo uNkulunkulu uzikhukhulile izitha zami ngesandla sakhe.” Ngakho leyondawo yasibizwa ngokuthi yiBhali-Pherazimi. 12 AmaFilisti ayebaleke atshiya onkulunkulu bawo khonale, uDavida wathi kabatshiswe ngomlilo.

13 AmaFilisti aphinda njalo ukuhlasela isigodi, 14 ngakho uDavida wabuza kuNkulunkulu njalo, uNkulunkulu wamphendula wathi, “Ungasuki uqonde phambili kodwa bazingeleze ubusubahlasela uvelela ezihlahleni zamalala. 15 Kuzakuthi lapho usizwa izisinde zabahambayo ezihlahleni zebhalisamu, uphume uhlasele, ngoba lokho kuzabe kusitsho ukuthi uNkulunkulu usehambe phambi kwakho ukuyanqoba amabutho amaFilisti.” 16 Ngakho uDavida wenza njengokulaywa kwakhe nguNkulunkulu, wawatshaya amaFilisti kusukela eGibheyoni kusiya eGezeri.

17 Yikho udumo lukaDavida lwanda lwafinyelela kuwo wonke amazwe, uJehova wenza izizwe zonke zimesabe.